ໃນຕອນເຊົ້າວັນທີ 8 ຕຸລາ 2024 ນີ້, ທີ່ພັດຕາຄານສີຈອມວົງ ພະແນກສຶກສາທິການ ແລະ ກິລາແຂວງຜົ້ງສາລີ ພ້ອມດ້ວຍໂຮງຮຽນ 3 ສູນ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ ວັນທີ 7 ຕຸລາ ຄົບຮອບ 30 ປີ ພ້ອມທັງຍ້ອງຍໍບຸກຄົນທີ່ມີຜົນງານດີເດັ່ນ ປະກອບສ່ວນເຂົ້າໃນການພັດທະນາວຽກງານການສຶກສາ,
ວິທະຍາສາດ ແລະ ກິລາ ໂດຍການເປັນປະທານຂອງທ່ານ ຄໍາເຫຼັກ ໃຈອີສານ ກໍາມະການປະຈໍາພັກແຂວງ ຮອງເຈົ້າແຂວງ ຜູ້ຊີ້ ນໍາຂົງເຂດວັດທະນະທໍາ-ສັງຄົມ, ມີທ່ານ ພອນໄຊ ອ່ອນສາ ກໍາມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍຄະນະ, ມີບັນດາທ່ານແຂກຮັບເຊີນຈາກພະແນການອ້ອມຂ້າງແຂວງ, ຄະນະຫ້ອງການສຶກສາທິການ ແລະ ກິລາເມືອງບຸນເໜືອ, ອະດີດການນໍາຂະແໜງການສຶກສາ, ກອງບັນຊາການປກສ- ປກຊ, ບັນດາຄະນະອໍານວຍການໂຮງຮຽນ, ສູນ, ພະນັກງານວິຊາການທີ່ຂຶ້ນກັບພະແນກສຶກສາທິການ ແລະ ກິລາແຂວງ ຕະຫຼອດຮອດນັກຮຽນ-ນັກສຶກສາລວມທັງໝົດ 1 000 ກວ່າຄົນເຂົ້າຮ່ວມ.
ໃນພິທີ, ທ່ານ ພອນໄຊ ອ່ອນສາ ກໍາມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງໄດ້ຕາງໜ້າບັນດາໂຮງຮຽນ ແລະ ສູນຂຶ້ນເລົ່າປະຫວັດຄວາມເປັນມາຂອງວັນຄູແຫ່ງຊາດ ແລະ ບົດຖະແຫຼ່ງການວັນວິທະຍາສາດແຫ່ງຊາດ. ຈາກນັ້ນ, ຕາງໜ້ານັກຮຽນ-ນັກສຶກສາຂຶ້ນອ່ານກາບກອນອວຍພອນວັນຄູແຫ່ງຊາດຄົບຮອບ 30 ປີ ແລະ ມອບຊໍ່ດອກໄມ້, ຂອງຂວັນໃຫ້ແກ່ຄູອາຈານ, ຄະນະອໍານວຍການໂຮງຮຽນ, ຜູ້ບໍລິຫານການສຶກສາ ແລະ ກິລາ, ອະດີດການນໍາຂະແໜງການສຶກສາ ພ້ອມດ້ວຍແຂກຮັບເຊີນຈາກພະແນການອ້ອມຂ້າງແຂວງ.
ການຈັດພິທີສະເຫຼີມສະຫຼອງວັນຄູແຫ່ງຊາດ ວັນທີ 7 ຕຸລາ ແມ່ນເພື່ອລະນຶກເຖິງຄຸນງາມຄວາມດີຂອງຄູຜູ້ທີ່ເສຍສະຫຼະ ແລະ ປະຕິບັດໜ້າທີ່ຢ່າງໜັກໜ່ວງ ເພື່ອຖ່າຍທອດຄວາມຮູ້ ແລະ ແສງສະຫວ່າງອັນສົດໃສໃຫ້ແກ່ລູກຫຼານຂອງປະຊາຊົນລາວ ບັນດາເຜົ່າໃນຕະຫຼອດໄລຍະຜ່ານມາ ຄູໄດ້ມີຄວາມພະຍາຍາມສູງ ອຸທິດຕົນແກ່ການສິດສອນໃຫ້ລູກຫຼານປະຊາຊົນລາວບັນດາເຜົ່າ ໃຫ້ກາຍເປັນຜູ້ມີຄວາມຮູ້, ເປັນນັກຮຽນຮູ້ປັນຍາຊົນ, ເປັນຜູ້ຊ່ຽວຊານ ແລະ ເປັນການນໍາຂັ້ນຕ່າງໆ; ຄູຍັງໄດ້ ປະກອບສ່ວນໃຫຍ່ຫຼວງ ໃນພາລະກິດຕໍ່ສູ້ກູ້ຊາດ; ເຮັດການປະຕິວັດຊາດ ເພື່ອຄວາມເປັນເອກະລາດ, ອິດສະຫຼະພາບ, ມີສິດເສລີພາບ, ປະຊາທິປະໄຕ ກໍຄືໃນໄລຍະປະຕິບັດສອງໜ້າທີ່ຍຸດທະສາດປົກປັກຮັກສາ ແລະ ສ້າງສາພັດທະນາປະເທດຊາດ.
ໃນຂະນະດຽວກັນນັ້ນ, ໃນພິທີຍັງໄດ້ມອບໃບຍ້ອງຍໍຂັ້ນພະແນກ, ຂັ້ນແຂວງ, ຂັ້ນກະຊວງ ແລະ ນາມມະຍົດພັດທະນາດີເດັ່ນ ຂອງກະຊວງສຶກສາທິການ ແລະ ກິລາ ໃຫ້ແກ່ບຸກຄົນທີ່ມີຜົນງານດີເດັ່ນ ປະກອບສ່ວນເຂົ້າໃນການພັດທະນາວຽກງານການສຶກສາ, ວິທະຍາສາດ ແລະ ກິລາ ແລະ ມອບຂອງທີ່ລະນຶກໃຫ້ອະດີດການນຳສຶກສາທິການ ແລະ ກິລາ ພ້ອມທັງມອບຂອງຂວັນໃຫ້ຄະນະນຳພະແນກສຶກສາທິການ ແລະ ກິລາ ປັດຈຸບັນ.
ໃນພິທີທີ່ມີຄວາມໝາຍ ຄວາມສໍາຄັນນີ້, ທ່ານ ຄໍາເຫຼັກ ໃຈອີສານ ກໍາມະການປະຈໍາພັກແຂວງ ຮອງເຈົ້າແຂວງ ຜູ້ຊີ້ ນໍາຂົງເຂດວັດທະນະທໍາ-ສັງຄົມໄດ້ໂອ້ລົມ ແລະ ເນັ້ນໜັກໃຫ້ພະນັກງານ-ຄູອາຈານເອົາໃຈໃສ່ ຈັດຕັ້ງປະຕິບັດໃນຫຼາຍໆດ້ານ ໂດຍສະເພາະແມ່ນການຈັດຕັ້ງປະຕິບັດ 3 ລັກສະນະ ແລະ 5 ຫລັກມູນຂອງການສຶກສາ ເຊິ່ງເປັນເປົ້າຫມາຍສໍາຄັນຫຼັກ ໃນການຫຼໍ່ຫຼອມຄົນໃຫ້ມີຄຸນນະພາບ ເພາະຄູເປັນປັດໃຈຫຼັກໃນການຕັດສີນຊີ້ຂາດ ຕໍ່ການສ້າງຊັບພະຍາກອນມະນຸດໃຫ້ມີສະຖຽນລະພາບທີ່ດີ, ມີຄວາມຮູ້ຄວາມສາມາດ, ມີຄຸນສົມບັດສິນທໍາປະຕິວັດຢ່າງຄົບຖ້ວນ, ສ້າງໃຫ້ຄົນມີພັດທະນາການອັນໃໝ່ ທັງສະຫຼາດຫຼັກແຫຼມ ແລະ ທັນສະໄຫມ ໃຫ້ສົມກັບນາມມະຍົດທີ່ວ່າ: ຄູ ແມ່ນແມ່ພີມຂອງຊາດ, ຄູ ແມ່ນຄົນຂອງພັກ, ຄູ ເປັນແມ່ຜູ້ທີສອງຂອງເດັກ ແລະ ຄູ ແມ່ນນັກວິສະວະກອນແຫ່ງດວງວິນຍານຂອງຊາດ.
ຄະນະຮັບຜິດຊອບຂ່າວສານ ສກຂ ຂ່າວໂດຍ: ຄະນະຮັບຜິດຊອບຂ່າວສານ ສກຂ