6 ໜ່ວຍພັກທີ່ຂຶ້ນກັບຄະນະພັກຮາກຖານພະແນກສຶກສາທິການ ແລະ ກິລາແຂວງຜົ້ງສາລີໄດ້ຮັບການຢັ້ງຢືນເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມອບບັດສະມາຊິກພັກ
ປະຈໍາປີ 2023
ໃນຕອນເຊົ້າ ວັນທີ 4 ຕຸລາ 2024, ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ປະຈໍາປີ 2023 ຂອງ 6 ໜ່ວຍພັກທີ່ຂຶ້ນກັບຄະນະພັກຮາກຖານພະແນກສຶກສາທິການ ແລະ ກິລາ ແຂວງຜົ້ງສາລີ ໂດຍການໃຫ້ກຽດເຂົ້າຮ່ວມ ແລະ ກ່າວມອບໃບຢັ້ງຢືນຂອງສະຫາຍ ຄໍາເຫຼັກ ໃຈອີສານ ກໍາມະການປະຈໍາພັກແຂວງ ຮອງເຈົ້າແຂວງ ຜູ້ຊີ້ນໍາຂົງເຂດວັດທະນະທໍາ-ສັງຄົມ, ມີສະຫາຍ ພອນໄຊ ອ່ອນສາ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກສຶກສາທິການ ແລະ ກິລາ, ມີບັນດາສະຫາຍຕາງໜ້າຈາກພະແນກການທີ່ກ່ຽວຂ້ອງ ພ້ອມດ້ວຍຄະນະພັກຮາກຖານພະແນກສຶກສາທິການ ແລະ ກິລາ, ຕະຫຼອດຮອດສະມາຊິກພັກສະໄໝສໍາຮອງ ແລະ ສົມບູນພາຍໃນ 6 ໜ່ວຍພັກເຂົ້າຮ່ວມລວມທັງໝົດ 127 ສະຫາຍ, ຍິງ 63 ສະຫາຍ.
ໃນພິທີ ສະຫາຍ ບຸນຈັນ ໄມ່ຕ່ວນ ຮອງເລຂາຄະນະພັກຮາກຖານພະແນກສຶກສາທິການ ແລະ ກິລາແຂວງ ເລຂາໜ່ວຍພັກວິຊາການ ໄດ້ຕາງໜ້າ 6 ໜ່ວຍພັກຂຶ້ນຜ່ານບົດສະຫຼຸບການຈັດຕັ້ງປະຕິບັດກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃນປີຜ່ານມາ ແລະ ຜ່ານແຜນຈຸດສຸມປະຈໍາປີ 2024. ເຊິ່ງສະຫາຍໄດ້ຍົກໃຫ້ເຫັນດ້ານດີ, ດ້ານອ່ອນ, ສາເຫດທີ່ພາໃຫ້ມີດ້ານດີ, ດ້ານອ່ອນ ກ່ຽວກັບການນໍາພາທາງດ້ານການເມືອງ, ຄຸນສົມບັດ ສິນທໍາປະຕິວັດ, ການຕີລາຄາຈັດແບ່ງສະມາຊິກພັກ, ການສໍາຫຼວດຕີລາຄາສະມາຊິກໜ່ວຍພັກ ພ້ອມທັງຍົກໃຫ້ເຫັນບາງບົດຮຽນທີ່ຖອດຖອນໄດ້. ຈາກນັ້ນ, ຕາງໜ້າຄະນະຈັດຕັ້ງແຂວງໄດ້ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງວ່າດ້ວຍການມອບໃບຢັ້ງຢືນໃຫ້ 6 ໜ່ວຍພັກ ທີ່ຂຶ້ນກັບຄະນະພັກຮາກຖານພະແນກສຶກສາທິການ ແລະ ກິລາແຂວງ ໂດຍໃຫ້ກຽດກ່າວມອບຢ່າງເປັນທາງການຂອງ ສະຫາຍ ຄໍາເຫຼັກ ໃຈອີສານ ກໍາມະການປະຈໍາພັກແຂວງຮອງເຈົ້າແຂວງ ຜູ້ຊີ້ນໍາຂົງເຂດວັດທະນະທໍາ-ສັງຄົມ. ພ້ອມດຽວກັນນັ້ນ, ໃນພິທີຍັງໄດ້ມອບບັດສະມາຊິກພັກໃຫ້ແກ່ບັນດາສະຫາຍສະມາຊິກພັກສົມບູນທີ່ມີເງື່ອນໄຂຄົບຕາມມາດຖານ ຈໍານວນ 30 ສະຫາຍ, ຍິງ 15 ສະຫາຍ ແລະ ໃຫ້ກຽດກ່າວມອບໂດຍ ສະຫາຍ ພອນໄຊ ອ່ອນສາ ກໍາມະການພັກແຂວງ ເລຂາຄະນະພັກຮາກຖານພະແນກສຶກສາທິການ ແລະ ກິລາແຂວງ.
ໃນໂອກາດທີ່ມີຄວາມໝາຍຄວາມສໍາຄັນນີ້, ສະຫາຍ ຄໍາເຫຼັກ ໃຈອີສານ ກໍາມະການປະຈໍາພັກແຂວງຮອງເຈົ້າແຂວງ ຜູ້ຊີ້ນໍາຂົງເຂດວັດທະນະທໍາ-ສັງຄົມ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ໄຊຊະນະທີ່ 6 ໜ່ວຍພັກຍາດມາໄດ້ໃນໄລຍະຜ່ານມາ ຈົນສາມາດຮັບການຢັ້ງຢືນຜົນສໍາເລັດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນປະຈໍາ 2023. ພ້ອມນັ້ນ, ສະຫາຍຍັງໄດ້ຮຽກຮ້ອງໃຫ້ສະມາຊິກພັກແຕ່ລະພາກສ່ວນເອົາໃຈໃສ່ຄົ້ນຄວ້າ, ເຊື່ອມຊຶມມະຕິຂອງພັກ, ຂໍ້ກໍານົດ, ກົດໝາຍຂອງລັດທີ່ຕິດພັນກັບໜ້າວຽກຂອງຕົນໃຫ້ເລິກເຊິ່ງ ແລະ ກວ້າງຂວາງ ເພື່ອແນໃສ່ໃຫ້ພະນັກງານ, ສະມາຊິກພັກກໍາໄດ້ລະບຽບຫຼັກການຂອງພັກ ແລະ ກົດໝາຍຂອງລັດ. ພ້ອມທັງເຕົ້າໂຮມຄວາມສາມັກຄີ ເພື່ອເປັນກ້ອນກໍາລັງໃນການຈັດຕັ້ງປະຕິບັດບັນດາຄາດໝາຍ MDG ແລະ SDG4 ໃຫ້ບັນລຸຕາມແຜນການທີ່ໄດ້ວາງໄວ້, ຫັນການບໍລິຫານ ແລະ ການປະຕິບັດໜ້າທີ່ວຽກງານວິຊາສະເພາະ ດ້ວຍລະບົບເອເລັກໂທຣນິກທັນສະໄໝໃຫ້ຫຼາຍຂຶ້ນ ແນໃສ່ສືບຕໍ່ສ້າງ, ຮັກສາມູນເຊື້ອໜ່ວຍພັກປອດໃສ, ເຂັ້ມແຂງ, ໜັກແໜ້ນນີ້ໄວ້ຕະຫຼອດໄປ.
ພິທີດັ່ງກ່າວໄດ້ດໍາເນີນເປັນເວລາ 01 ຕອນ ແລະ ໄດ້ປິດລົງຢ່າງເປັນທາງການດ້ວຍຜົນສໍາເລັດຕາມຈຸດປະ ສົງ ແລະ ຄາດໝາຍທີ່ວາງໄວ້.
ຄະນະຮັບຜິດຊອບຂ່າວສານ ສກຂ ຂ່າວໂດຍ: ໄທພອນ ມະນີຈັນ (ສກຂ ຜົ້ງສາລີ)
